യാത്ര

ഈ ഇടത്താവളവും
ഞാന്‍ ഉപേക്ഷിയ്ക്കാനൊരുങ്ങുകയാണ്
അടുത്ത താവളത്തിലേയ്ക്കുള്ള-
യാത്ര തുടങ്ങാന്‍ സമയമായിരിയ്ക്കുന്നു

ഇതുവരെയുള്ള യാത്രയ്ക്കിടയില്‍ -
കണ്ട കാഴ്ചകളും മുഖങ്ങളും ഏറെ,
പിന്നെയീ ഇടത്താവളത്തിലെ താമസത്തിനിടയില്‍
സ്ഥാപിച്ചെടുത്ത ബന്ധങ്ങളും
ഒന്നിനും മനം കൊടുക്കരുതെന്നു കരുതിയിട്ടും
ചിലതെല്ലാം മനസ്സില്‍ കയറിക്കൂടിയിരിയ്ക്കുന്നു...

ലക്ഷ്യത്തിലേയ്ക്കുള്ള യാത്രയില്‍
ഇടത്താവളങ്ങളിലെ താമസത്തിന്റെ-
ദൈര്‍ഘ്യം കുറവായിരിയ്ക്കണമെന്ന സാമാന്യതത്വം,
പലപ്പോഴും വിസ്മരിയ്ക്കപ്പെടുന്നു...
ലക്ഷ്യത്തെ ഇടത്താവളങ്ങളായി ഭാഗിച്ചാല്‍
അതിലേയ്ക്കുള്ള യാത്രയുടെ കാഠിന്യം കുറയ്ക്കാമത്രെ...

കേട്ടറിവു മാത്രം വെച്ച്-
വഴിയറിയാത്ത ദിക്കുകളിലൂടെ
അടുത്ത താവളത്തിലേയ്ക്കുള്ള യാത്ര...
ഇനി യാത്രയ്ക്കായി ഞാന്‍ ഒരുങ്ങട്ടെ,
ഈ താവളം ഉപേക്ഷിയ്ക്കാനായും....